Published - Bin Laden is Still Alive?

by Pilipino Star Ngayon

MANILA, Philippines – Duda ang mga anak ni chief international terrorist Osama bin Laden na napatay ang kanilang ama sa isang pagsalakay ng tropang Amerikano sa pinagkukutaan nito sa Abbottabad, Pakistan kamakailan.

Sa isang pahayag na pinadala sa New York Times, posible raw na bihag lang ng US ang kanilang ama at pinalabas lang na ito’y patay na.

Sinabi ng ikaapat na anak na lalaki ni bin Laden na si Omar bin Laden na, dahil walang maipakitang bangkay o ebidensiyang litrato, hindi kumbinsido ang kanyang pamilya na patay na nga siya. Maniniwala lang umano sila kung maililitaw ng US ang mga larawan ng bangkay ni Osama.

Pinuna pa ni Omar na, kung patay na talaga ang kanilang ama, “bakit ang isang tao na hindi armado ay hindi inaresto nang buhay at nilitis sa korte ng batas para malaman ng mamamayan ng mundo ang katotohanan?”

Bunsod nito kaya nanawagan ang pamilya sa United Nations na gumawa ng imbestigasyon sa kahina-hinalang ulat na napaslang ang kanilang ama.

Sinasabi pa sa paha­yag na dapat ding pakawalan ang mga kamag-anak ni bin Laden na inaresto sa ginawang pagsalakay sa kanyang kuta sa Pakistan noong Mayo 2.

Naipagkait din umano sa kanilang pamilya ang pagsasagawa ng relihiyosong seremonya sa naging desisyon ng US na ilibing sa dagat ang bangkay ni bin Laden.